Laumuauglýsingar á Óskarsverðlaununum

Samsung mun hafa eytt um það bil 20 milljónum dala, sem samsvarar rúmur tveimur milljörðum króna, í auglýsingar á Óskarsverðlaununum. Fyrirtækið hefur þó líklega fengið mesta kynningu frá Ellen DeGeneres, kynni verðlaunahátíðarinnar.

Wall Street Journal segir frá þessu.

Ellen handlék Samsung síma á sviði og svo lét hún Bradley Cooper fá Galaxy Note 3 síma til að taka „selfie“ myndina sem tröllréð internetinu í gær. Þrátt fyrir að atvikið leit út fyrir að vera óskipulagt, var ekki svo.

Samkvæmt WSJ hafði Samsung gert samkomulag við ABC, sjónvarpsstöðina sem sá um útsendingu verðlaunahátíðarinnar, um að nota snjallsíma fyrirtækisins í útsendingunni. Þá fékk ABC síma gefins til að setja í mynd og var það gert.

Uppruni „selfie“ myndanna var þó af öðrum toga. Þegar Ellen kom fram með hugmyndina um að taka slíkar myndir, stungu forsvarsmenn ABC upp á því að hún notaðist við Samsung síma. Á æfingum fyrir útsendinguna kenndu starfsmenn Samsung Ellen að nota símann.

Samsung var þó ekki eina fyrirtækið sem var auglýst í beinni útsendingu, en Ellen pantaði pítsur fyrir gesti frá Big Mamma´s og Pappa´s Pizzeria í Los Angeles. Þá komu pítsurnar í kössum merktum Coca-Cola.

.