Totti magnaður í sigri Roma

Roma og Napoli unnu sigra í leikjum kvöldsins í ítölsku úrvalsdeildinni í kvöld.

Roma vann góðan sigur á Udinese, 3-2, þar sem Francesco Totti skoraði fyrsta mark sinna mann og lagði hin tvö upp fyrir þá Mattia Destro og Vasilis Torosidis. Giampiero Pinzi og Dusan Basta skoruðu mörk Udinese.

Fyrr í kvöld vann Napoli dramatískan útisigur á Torino, 1-0, þar sem Gonzalo Higuain skoraði sigurmark sinna manna í blálok leiksins.

Torino hefur tapað fjórum leikjum í röð en var sterkari aðilinn í kvöld. Heimamenn skutu til að mynda tvívegis í stöng en að lokum var það Higuain sem stal sigrinum fyrir gestina.

Roma er í öðru sæti deildrinnar með 61 stig, fjórtán stigum á eftir Juventus. Napoli er svo í þriðja sætinu með 58 stig.