Yfirvofandi sexföldun vaxta í Bretlandi

Forstjóri Bank of England segir að vextir muni líklega hækka sexfalt, þ.e. úr 0,5% í 3% til ársins 2017. Ástæða þess er að breskt efnahagslíf er í mestun vexti  allra landa í hinum þróaða heimi.

Það að vextir verði 3% kann að teljast eðlilegra en þeir vextir sem nú bjóðast. Það finnst að minnsta kosti fjármagnseigendum sem ekki hafa ávaxtað pund sitt vel síðastliðin sex ár, en lágvaxtastefna hefur verið við líði allan þann tíma til að örva efnahagslífið.

Ekki er víst að lántakendur verði eins hressir með þessa yfirvofandi hækkun vaxta, þó þeir fari nú ekki í himinhæðir, sérstaklega í samanburði við vexti hér á Íslandi.  Hagvöxtur í Bretlandi stefnir í 3,3% hagvöxt einungis á fyrri helmingi þessa árs og slær það við öllum öðrum G7 löndum.

Þessi efnahagsuppgangur kemur í kjölfar mestu lægðar efnahagslífsins frá síðari heimsstyrjöld. Vextir hafa aldrei verið svo lágir sem nú, enda fjári nærri núllinu og svo sem ekki annað fyrirsjánlegt en að þeir myndu hækka. Vextir hafa verið svona lágir frá árinu 2009.

Fjármagnseigendur hafa ekki verið öfundsverðir en húsnæðiskaupendur hafa á hinn bóginn notið góðs af. Húsnæðisverð hefur rokið upp að undanförnu. Áhyggjur eru því skiljanlegar af því að þeir sem keypt hafa húsnæði að á undanförnum árum verði í erfiðleikum við afborganir þegar þessar vaxtahækkanir ganga í garð.

Hækkun vaxta úr 0,5% í 3% á 150.000 punda húsnæðisláni kemur til með að hækka afborgun þess um 43.000 krónur á mánuði og ekki er víst að allir standi undir því.