3800 flugum aflýst

Flugfélagið Lufthansa hefur aflýst 3800 flugum á tímabilinu 2.–4. apríl vegna yfirvofandi verkfalls flugmanna.

5400 flugmenn hafa boðað til þriggja daga verkfalls í vikunni en flugmenn hafa barist fyrir réttindum sínum í tengslum við starfslok og lífeyrisréttindi. 

Lufthansa hafði áður komið fram með tilboð sem ekki var talið ásættanlegt. Félagið mun verða af tugi milljóna evra vegna verkfallsins og er skaðinn í raun skeður þar sem flugfélagð hefur nú þegar tilkynnt að umrædd flug falli niður.

Árið 2010 boðuðu flugmenn félagsins til fjögurra daga verkfalls en það stóð aðeins yfir í einn dag. Þrátt fyrir það þurfti að hætta við 2000 flug og varð tap félagsins um 48 milljónir evra á einum degi, eða um 7,5 milljarður íslenskra króna.