Boullier: Það er hægt að ná Mercedes

Hinn franski keppnisstjóri McLaren, Eric Boullier segist ekki efast um að það sé hægt að ná Mercedes liðinu. Hann telur að brúa megi bilið þó það gæti tekið talsverðan tíma.

Hann var spurður hvort hann væri sammála yfirlýsingu Jenson Button um að McLaren sé núna annað fljótasta liðið.

„Ég trúi því að ef þú skoðar tölvugögnin frá Jenson vorum við um það bil að fara að enda á undan Force India,“ segir Boullier.

„Svo ég er sammála því, það gæti verið að við séum annað fljótasta liðið á eftir Mercedes, bestir af restinni. En það er mjög, mjög stutt á milli allra.

Við erum að vinna mjög markvisst að því að ná þeim (Mercedes). Ég veit ekki hvort við munum ná þeim fyrir keppnirnar í Evrópu en við vonumst til að gera það eins fljótt og við getum,“ sagði Boullier.

Eftir erfitt tímabil í fyrra er mikil pressa á McLaren að snúa blaðinu við og ná aftur á toppinn.

Endurkoma Ron Dennis virðist hafa verið mikilvægt skref í rétta átt. Liðinu hefur gengið mun betur í ár en í fyrra. McLaren leiddi stigakeppni bílasmiða eftir fyrstu keppnina.