Mercedes-menn fljótastir í Barein

Mercedes-mennirnir Lewis Hamilton og Nico Rosberg voru fljótastir á báðum æfingum dagsins í Barein í dag. Þriðji varð Fernando Alonso á Ferrari.

Alonso náði besta tímanum rétt undir lok fyrri æfingarinnar. Hins vegar komu Mercedes-bílarnir þá aftur út og fóru báðir hraðar en Ferrari-maðurinn, Hamilton örlítið sneggri en Rosberg.

Nico Rosberg þarf að fara fyrir dómara keppninnar og gera grein fyrir sínu máli. Hann er sakaður um að hafa ekið í veg fyrir Sergio Perez á Force India.

Á seinni æfingunni varð Daniel Ricciardo á Red Bull fjórði en liðsfélagi hans Sebastian Vettel sjöundi. Fyrri æfingin gekk ekki eins vel hjá Red Bull, þar varð Vettel tíundi og Ricciardo fjórtándi.

Lotus átti viðburðarríka sinni æfingu. Vélarbilun háði Romain Grosjean en liðsfélagi hans, Pastor Maldonado tókst á loft eftir að hafa lent á brautarkant í beygju fjögur.

Seinni æfingin fór fram á flóðlýstri brautinni í Bahrain. Keppnin hefst kl 18 á sunnudag að staðartíma. Það mun því dimma meðan keppnin stendur yfir.

Útsending frá laugardagsæfingunni hefst klukkan 11:55 á morgun á Stöð 2 Sport. Útsending frá tímatökunni hefst svo klukkan 14:50. Keppnin sjálf er svo á dagskrá klukkan 14:30 á sunnudag.