Tveir titlar ekki nóg fyrir Alonso

Fernando Alonso segir að hann verði ekki áægður ef hann verður enn bara með tvo heimsmeistaratitla þegar hann  hættir í Formúlu eitt.



Alonso batt enda á sigurgöngu Michael Schumacher með því að verða heimsmeistari ökumanna 2005 og 2006. Hann hefur svo í þrígang komist nálægt því að vinna aftur eða árin 2007, 2010 og 2012.

Þegar hann samdi við Ferrari bjóst hann eflaust ekki við því að þurfa að bíða lengi eftir fyrsta titlinum þar. Alonso fór til Ferrari frá Renault liðinu fyrir tímabilið 2010.

„Ég hélt aldrei að ég yrði Formúlu 1 ökumaður, ég hugsaði aldrei um að vinna formúlukeppni svo ég var alls ekki viss um að ég gæti unnið tvo heimsmeistaratitla,“ sagði Alonso.

„Ég er afar stoltur og afar ánægður með ferilinn minn. Ef þú spyrð mig núna á miðju tímabili, þá þyrstir mig í árangur og ég get sagt þér að tveir heimsmeistaratitlar eru ekki nóg,“ sagði Ferrari ökumaðurinn.

Þrátt fyrir erfiða byrjun Ferrari á tímabilinu, sem náði ef til vill hámarki með afsögn Stefano Domenicali í vikunni er Alonso hvergi nærri saddur.