Þessi verða í nýju Stjörnustríðsmyndinni

Framleiðendur sjöundu Stjörnustríðsmyndarinnar hafa loksins sent frá sér tilkynningu um það hverjir fara með hlutverk í myndinni.

Það eru leikararnir John Boyega, Daisy Ridley, Adam Driver, Oscar Isaac, Andy Serkis, Domhnall Gleeson og Max von Sydow sem mæta nýjir til leiks en einnig verða gamlir félagar á sínum stað.

Þau Harrison Ford, Carrie Fisher, Mark Hamill, Anthony Daniels, Peter Mayhew og Kenny Baker fara öll með hlutverk í myndinni, en þau léku í fyrstu myndunum þremur sem komu út á árunum 1977 til 1983.

„Það er bæði spennandi og súrrealískt að sjá þessa ástsælu gömlu leikara vinna með þessum frábæru nýju leikurum,“ segir J.J. Abrams, leikstjóri myndarinnar, en tökur á henni hefjast á næstu vikum.

Star Wars: Episode VII verður frumsýnd jólin 2015.