Brynjar Morthens leikur Bubba Morthens

Ásgeir Sigurðsson skrifar handritið að seríunni og leikstýrir henni. Hann gerði einnig seríuna „Gestir“ fyrir Sjónvarp Símans sem kom út í febrúar á þessu ári þar sem að Diljá Pétursdóttir tónlistarkona lék aðalhlutverkið ásamt honum sjálfum.

Líkindi feðganna þeirra Bubba og Brynjars eru mikil og er hann á svipuðum aldri og faðir hans þegar hann var að hefja ferilinn. Brynjar útskrifaðist sem leikari í Vancouver og vakti mikla athygli þegar hann fór með hlutverk föður síns í nokkrum sýningum 9líf í Borgarleikhúsinu.

Alltaf langað að komu sögu Bubba á skjáinn

Þættirnir segja frá æsku Bubba og upphafi ferils hans sem tónlistarmanns og byltingu hans ásamt brestum sem komu til með að lita líf hans og gera hann að manninum sem hann er í dag. Serían hefst í kringum æsku Bubba á sjöunda áratug og teygir sig allt að árinu 1985, þar sem hann hóf feril sinn sem trúbador, spilaði með Utangarðsmönnum, Egó og sólóferillinn og frægðin sem fylgdi.

„Sagan hans Bubba er eitthvað sem mig hefur langað til að koma á skjáinn í dálítinn tíma og er það heiður og draumur að fá að verða að því, hún er einlæg, falleg og epísk og er löngu kominn tími til þess að koma henni á silfurskjáinn fyrir íslenska áhorfendur sem flestir hafa alist upp eða lifað með tónlist Bubba síðustu áratugi,“ segir Ásgeir. Þættirnir eru framleiddir af Júlíus Kemp fyrir Kvikmyndafélag Íslands ásamt, Antoni Karli Kristensen, Ásgeiri Sigurðssyni og Halldóri Ísaki Ólafssyni fyrir LJÓS Films.

„Þetta er saga sem við þekkjum öll en höfum ekki séð nema á sviði og er núna kominn tími að koma þessu á skjáinn, sagan teygir sig yfir nokkra áratugi og er þess vegna mikil vinna framundan og mikilvægt að sýna persónum og umhverfi virðingu, ásamt sögu Bubba en ég tel mig vera rétta manninn til þess að gera þetta að veruleika og Bubbi hefur treyst mér fyrir því verkefni,“ segir Ásgeir.