Vettel vantar nýjan undirvagn

Sebastian Vettel mun fá nýjan undirvagn fyrir spænska kappaksturinn. Hann hefur átt í vandræðum hingað til en Red Bull vonar að nýr undirvagn hjálpi fjórfalda heimsmeistaranum.

Vettel hefur ekki tekist að sýna sama hraða og liðsfélagi hans, Daniel Ricciardo í tímatökum og keppnum á tímabilinu.

Christian Horner liðsstjóri Red Bull sagði í upphafi tímabils að munurinn lægi í uppstillingu bílsins. Helmut Marko segir að vandinn felist í undirvagni bílsins.

„Við skiljum ekki af hverju Vettel eyddi dekkjunum miklu hraðar en Ricciardo,“ sagði Marko, ráðgjafi Red Bull, eftir kínverska kappaksturinn.

Red Bull verður líklega með nýjan undirvagn á Spáni. Marko telur að Vettel muni snúa aftur til fyrra forms ef hann fær bílinn til að virka.

Ricciardo hefur lokið 3 keppnum af 4 á undan Vettel. Hann var að vísu dæmdur úr keppni í einni þeirra.

Það er athyglisverður árangur fyrir þær sakir að hann er nýr hjá Red Bull liðinu. Vettel hefur þegar unnið fjóra heimsmeistaratitla með Red Bull og ætti því að hafa örlítið forskot.