Sutil svelti sig í tvo daga til að léttast

Adrain Sutil ökumaður Sauber liðsins hefur greint frá því að hann hafi sleppt því að borða í tvo daga í örvæntingarfullri tilraun til að léttast.

Ný kynslóð véla sem tekin var í notkun í ár er þyngri en forveri hennar. Það hefur leitt til þess að bílarnir eru ekki í eins góðu jafnvægi og áður.

Samkvæmt tæknireglugerðinni verður bíllinn með ökumanni að vera að minnsta kosti 691 kg. Nú þegar vélin er þyngri er minna hægt að nýta af lóðum. Þau voru áður sett á útvalda staði til að auka jafnvægi og bæta aksturseiginleika bílsins.

Liðin hafa gripið til þess ráðs að senda ökumenn sína í megrun.  Ekki er þó af miklu að taka enda eru Formúlu 1 ökumenn allir í mjög góðu formi fyrir. Tilgangurinn er að færa þyngdina á hentugari staði í bílnum en ökumannssætið, með lóðum.

„Ég prófaði aðeins hér og þar. Tveir dagar án matar og bara drekka, ég prófaði það. Það var ekki auðvelt, en áhugavert að sjá hver viðbrögðin voru. Ég er samt að borða núna, sem er betra. Æfingakerfið mitt hefur breyst, vegna þess að ég þurfti að missa vöðva svo ég get hlaupið, en hjólreiðar byggja bara upp vöðva og það þunga vöðva, svo maður þarf að forðast svoleiðis hluti,“ sagði Sutil um sínar leiðir til að léttast.

Umræða um hættur þess að svelta sig til að léttast hafa skapast í Formúlu 1. Hugmyndir um lágmarks líkamsþyngdarstuðul (BMI) hafa heyrst. Slík regla er líkleg til að auka forskot lágvaxnari ökumanna.