Cambiasso á förum frá Inter

Esteban Cambiasso er frjálst að yfirgefa Internazionale í sumar, en félagið hefur ákveðið að endurnýja ekki samning sinn við argentínska miðjumanninnn sem hefur verið í röðum Inter frá árinu 2004.

"Við útskýrðum fyrir honum að vegna áætlana okkar um að endurnýja leikmannahópinn, þá verði honum ekki boðinn nýr samningur," sagði Piero Ausilio, íþróttastjóri Inter, í gær.

Cambiasso, sem verður 34 ára í ágúst, varð fimm sinnum ítalskur meistari með Inter, fjórum sinnum bikarmeistari, auk þess sem hann vann Meistaradeild Evrópu vorið 2010.

Cambiasso er ekki eini reyndi Argentínumaðurinn sem yfirgefur Inter í sumar. Javier Zanetti hefur ákveðið að leggja skóna á hilluna og þá verða samningar Diegos Milito og Walters Samuel ekki endurnýjaðir.

Þegar næsta tímabil gengur í garð verður því líklegast enginn af þeim 11 leikmönnum sem voru í byrjunarliði Inter í úrslitaleik Meistaradeildarinnar 2010 enn í herbúðum liðsins.

Inter leikur lokaleik sinn á tímabilinu gegn Chievo í dag.