Webber: Ricciardo ekki gert nein mistök

Ástralinn Mark Webber hrósaði samlanda sínum og arftaka hjá Red Bull, Daniel Ricciardo eftir að sá síðarnefndi vann kanadíska kappaksturinn á sunnudag.

Ricciardo tók við sæti Webber hjá Red Bull fyrir tímabilið og hefur hingað til skákað fjórfalda heimsmeistaranum, liðsfélaga sínum Sebastian Vettel reglulega í tímatökum og keppnum. Ricciardo er ofar Vettel á stigatöflunni í heimsmeistarakeppni ökumanna.

„Fyrir Daniel að vinna sína fyrstu keppni var frábært. Hann hefur ekki gert nein mistök í ár hingað til. Það hafa verið erfiðar breytingar á reglugerðum, rigning í tímatökum, og alls kyns atriðið sem hann hefur þurft að sigrast á. En það er stórt skref fyrir hann að vinna sína fyrstu keppni,“ sagði Webber um samlanda sinn.

Mark Webber ver nú dögunum við þolkappakstur fyrir Porsche, lengri keppnir. Webber mun um komandi helgi taka þátt í hinum sögufræga Le Mans kappakstri sem stendur yfir í sólarhring.

„Ef ég á að vera hreinskilinn, þá hef ég notið kaflaskilanna á ferlinum, en ég hef samt horft á nokkrar keppnir (Formúlu 1 keppnir),“ sagði Webber að lokum.