Slökkti eld á stuttbuxum: „Ég tímdi ekki að fara heim“

Slökkviliðsmaður í stuttbuxum vakti mikla athygli lesenda Vísis í gærkvöldi. Myndir náðust af manni sem aðstoðaði slökkviliðsmenn við störf sín í gær. Lesendur Vísis voru spurðir hvort þeir könnuðust við manninn á Facebook-síðu Vísis í gærkvöldi. Leitin skilaði árangri. Maðurinn sem þarna var á ferðinni heitir Stefán Már Kristinsson og er aðstoðarvarðstjóri hjá slökkviliðinu og bráðatæknir.

„Þetta var alveg ótrúlegt. Ég var staddur í Hagkaup í Skeifunni þegar ég fékk boð um útkall, að það væri eldur í Skeifunni,“ rifjar Stefán upp og heldur áfram:

„Ég var svona fimm til sex mínútur inni í Hagkaup. Það var enginn eldur þegar ég fór inn, en það logaði allt þegar ég kom út. Ég ætlaði varla að trúa þessu, þetta var bara eins og eldgos.“

Stefán var með börnunum sínum í Hagkaup. „Já, ég var þarna með börnunum mínum sem eru átta og ellefu ára. Við búum þarna rétt hjá og ég sendi þau heim og sagði: „Pabbi er farinn að hjálpa strákunum.““

Myndirnar vöktu athygli

Myndir af Stefáni vöktu mikla athygli. „Já, þetta eru flottar myndir. Ég skil að það hafi vakið athygli að maður í borgaralegum klæðum hafi verið að hjálpa slökkviliðinu. Auðvitað hefði ég átt að vera í vesti eða einhverju, til að auðkenna mig. En ég gleymdi mér í „actioninu“. Ég er með búning heima og hefði getað farið að sækja hann. En ég tímdi ekki að fara heim. Þegar svona eldur kemur upp eru svo ótrúlega mörg verk sem þarf að vinna – meira að segja fyrir mann á stuttbuxum. Þannig að ég vissi að ég þyrfti að rjúka til og hjálpa,“ segir hann.

„Eins og olíuá“

Stefán var á vaktinni – í stuttbuxunum – til hálf tólf í gærkvöldi. „Ég átti aukavakt í dag og við sem áttum þær fórum heim rétt fyrir miðnætti til að vera ferskir daginn eftir. Starfið gekk alveg ótrúlega vel í gær. Þetta var rosalegt þarna á þakinu. Þarna er tjörupappi ofan á öllum húsunum og hefur örugglega verið lagður pappi ofan á pappa í áraraðir. Og hann virkar bara eins og olía. Þetta var eins og fljót eða eins og olíuá. Síðan bætast við öll efnin sem voru í húsunum. Þannig myndast þessi rosalegi reykur, sem þarna var, sem auðvitað allir sáu.“

Stefán segir starfið í dag hafa gengið vel. „Já, við erum að slökkva í svokölluðum hreiðrum og glóðum sem koma upp. Síðan er krabbinn búinn að rífa allt. Þetta gengur ótrúlega vel.“

Eigandi Víðis hafði á orði að slökkviliðsmenn hefðu unnið kraftaverk í gærkvöldi, matvöruverslunin slapp þrátt fyrir að vera ótrúlega nálægt brunanum. „Það er í raun ótrúlegt hvernig Víðir slapp. Fyrirtækið Stilling er þarna við hliðina á og þar var mikill reykur. En Víðir slapp algjörlega.“