18 þúsund sagt upp hjá Microsoft

Bandaríski hugbúnaðarrisinn Microsoft hyggst segja upp allt að 18 þúsund starfsmönnum næsta árið. Uppsagnirnar eru þær mestu í 39 ára sögu fyrirtækisins.

Flestir þeirra sem verður sagt upp, eða um 12.500, unnu áður hjá símafyrirtækinu Nokia sem Microsoft keypti í aprílmánuði síðastliðinn.

Uppsagnirnar eru mun umfangsmeiri en upphaflega var gert ráð fyrir, en á vef BBC segir að menn hafi búist við að sex þúsund starfsmönnum Microsoft yrði sagt upp. Alls starfa um 127 þúsund manns hjá fyrirtækinu víðs vegar um heim.