Ricciardo langar ekkert að keyra fyrir Ferrari

Daniel Ricciardo ökumaður Red Bull hefur engan áhuga á að aka fyrir hið ítalska lið Ferrari. Hann fullyrðir að hann sé betur settur hjá Red Bull.

Ástralinn ungi sem hefur ættir að rekja til Ítalíu segir það ekki einn af sínum draumum að keyra fyrir Ferrari. Margir ökumenn lýsa því sem sinni stærstu ósk að keyra fyrir hið sögufræga lið. Ricciardo er ekki einn þeirra.

„Í hreinskilni sagt finnst mér þetta klysja,“ sagði Ricciardo í viðtali við Gazzeta dello Sport.

„Sumir ökumenn eiga sér þann draum, en ég held að það tengist því að foreldrar þeirra héldu með Ferrari vegna sögunar og menningararfleifðarinnar,“ hélt hann áfram.

„Ítölsku genin mín koma þó klárlega fram þegar ég borða,“ sagði Ricciardo léttur í bragði.

Hann kveðst ánægður með sitt fyrsta ár hjá Red Bull og ætlar sér ekkert að fara þaðan í bráð.

„Ég var að vonast eftir ári sem þessu. Ég vissi að ef ég gerði allt rétt gæti ég barist við Sebastian (Vettel). Ég tel að fyrri hluti árs hafi verið mjög góður, markmiðið er bara að halda áfram á sömu braut,“ sagði Red Bull ökumaðurinn að lokum.