Mál Tony Omos: „Allslaus og upp á aðra kominn“

„Hann er á Ítalíu, allslaus og upp á aðra kominn,“ sagði verjandi flóttamannsins Tony Omos við fyrirtöku málsins um ógildingu á ákvörðun útlendingastofnunar og úrskurði innanríkisráðuneytisins um synjun á hæli hér á landi sem fram fór í Héraðsdómi Reykjavíkur í morgun. Sagði verjandi hans engan beita sér í málinu, þrátt fyrir að hafa ítrekað haft samband við útlendingastofnun.

Dómarinn lagði til að aðalmeðferðin færi fram í desember. Lögmaður Tony Omos óskaði eftir því að málið yrði tekið fyrir í nóvember í ljósi aðstæðna. Varð dómarinn við þeirri beiðni.

Mál Omos hefur vakið mikla athygli en í desember á síðasta ári var minnisskjali úr innanríkisráðuneytinu lekið til fjölmiðla þar sem fram kemur að hann sé grunaður um mansal.

Stefán Karl Kristjánsson, lögmaður Tony Omos, kærði Hönnu Birnu Kristjánsdóttur innanríkisráðherra og starfsmenn innanríkisráðuneytisins til lögreglu í kjölfar lekans. Telur lögmaðurinn að Tony hafi verið beittur ranglæti stjórnvalds við úrlausn eða meðferð máls, auk þess sem hann telur Tony hafa orðið fyrir ærumeiðingum og aðdróttunum af hálfu innanríkisráðuneytisins. Meint brot kunna að varða við sjö ákvæði hegningarlaga.

Hanna Birna neitar þó sök í málinu. Ríkissaksóknari höfðar nú mál á hendur Gísla Frey Valdórssyni, aðstoðarmanni innanríkisráðherra vegna málsins. Er hann ákærður fyrir brot gegn þagnarskyldu í starfi sínu sem aðstoðarmaður innanríkisráðherra með því að hafa látið í té upplýsingar „til þess fallnar að hafa áhrif á umfjöllun um málefni Tony Omos sem hælisleitanda.“

Brot Gísla varðar við 136. grein almennra hegningarlaga, en þar kemur fram að opinber starfsmaður sem segir frá nokkru er leynt á að fara og hann hefur fengið vitneskju um í starfi sínu eða varðar embætti hans eða sýslan, skuli sæta fangelsi allt að einu ári. Hafi hann gert það til þess að afla sér eða öðrum óréttmæts ávinnings, eða noti hann slíka vitneskju í því skyni, megi beita fangelsi allt að 3 árum.