Kristinn V. Jóhannsson, vallarstjóri Laugardalsvallar, segir í samtali við Vísi að hann hafi ekki áhyggjur af vellinum fyrir leikinn mikilvæga gegn Hollandi í kvöld.
Það hefur verið kalt að undanförnu en Kristinn segir að það hafi engu að síður ekki verið frost í jarðveginum í Laugardalnum í morgun.
„Grasið sjálft er bara hélað. Nú var sólin að komast yfir austurstúkuna og mér skilst að hitinn fari upp í 5-6 gráður í dag. Sólin reddar okkur í dag og þetta verður farið seinni partinn,“ sagði Kristinn.
„Samkvæmt veðurspám á að frysta upp úr klukkan átta í kvöld. Það er því aðallega leikmenn og áhorfendur sem þurfa að takast á við kuldann. Ég hef ekki áhyggjur af vellinum,“ bætti hann við.
U-21 lið Íslands leikur gegn Danmörku síðdegis á morgun og það er því nóg að gera hjá vallarstarfsmönnum KSÍ. „Þetta er bara skemmtilegt. Maður er orðinn vanur þessu,“ sagði Kristinn.
Sólin bjargar grasinu á Laugardalsvelli
Tengdar fréttir
Hollendingum var svolítið kalt í Dalnum í kvöld - myndir
Hollenska landsliðið æfði á Laugardalsvellinum í kvöld en framundan er leikur á móti sjóðheitu íslensku landsliði á sama stað klukkan 18.45 annað kvöld. Íslenska landsliðið getur náð sex stiga forskoti á Holland með sigri.
