Kolbeinn: Hollendingarnir afsökuðu sig með kuldanum

Kolbeinn Sigþórsson, sóknarmaður Ajax, á von á því að Belgar muni ekkert gefa eftir í leiknum gegn Íslandi hér í Brussel í kvöld.

„Það er gott að fá þennan leik. Belgía er með sterka einstaklinga en Tékkar betra lið í heildina. Það verður gott fyrir suma leikmenn okkar að fá tækifæri í þessum leik,“ sagði Kolbeinn sem reiknar með því að hann spili ekki heilan leik á morgun.

„Það er betra að spyrja þjálfarana að því en ég býst fremur við því að spila minna,“ sagði hann í viðtalinu sem má sjá í heild sinni hér fyrir ofan.

Kolbeinn segir það greinilegt að Belgar ætli sér að fara af fullum krafti í þennan leik miðað við byrjunarliðið sem Marc Wilmots landsliðsþjálfari tilkynnti í gær.

„Þeir eru með gríðarlega sterk lið og við sjáum hvaða áhrif það hefur. En ég býst við góðum leik frá okkur líka enda vilja menn sem fá tækifærið nú sýna sig og sanna.“

Ísland vann frækinn sigur á Hollandi, 2-0, í síðasta leik sínum í undankeppninni og Kolbeinn segir að það hafi verið gaman að koma aftur á æfingar á Ajax eftir sigurinn.

„Ég grínaðist aðeins í nokkrum leikmönnum sem voru nokkuð pirraðir,“ sagði hann í léttum dúr. „Þeir voru svolítið hissa á hvernig þeir spiluðu en afsökuðu sig með kuldanum - sögðu að þetta hefði verið of kalt fyrir þá.“

Markvörðurinn Jesper Cillessen, sem einnig leikur með Ajax, fær þó frið frá Kolbeini þessa dagana. „Hann er týpan sem pirrast fljótt þegar það er skotið á hann - ég læt hann því í friði núna.“

Um helgina birtust fréttir í hollenskum fjölmiðlum um meint rifrildi Kolbeins við þjálfara sinn hjá Ajax, Frank De Boer, en aðspurður vildi Kolbeinn ekki tjá sig um málið samtali við Vísi.