Lögreglustjórinn á höfuðborgarsvæðinu ætlar ekki að gefa Stöð 2 viðtal um lekamálið

Lögreglustjórinn á höfuðborgarsvæðinu ætlar ekki að veita fréttastofunni viðtal vegna lekamálsins. En ítrekað hefur verið óskað eftir viðtali við hana frá því upplýst var um samskipti hennar við Gísla Frey Valdórsson fyrrverandi aðstoðarmann innanríkisráðherra.

Mörgum spurningum er enn ósvarað varðandi samskipti núverandi lögreglustjóra á höfuðborgarsvæðinu og þáverandi aðstoðarmanns innanríkisráðherra. Meðal annars um innihald þeirrar greinargerðar sem lögreglustjórinn afhenti aðstoðarmanninum.

Allt frá því upplýst var í byrjun síðustu viku að Gísli Freyr Valdórsson fyrrverandi aðstoðarmaður innanríkisráðherra hefði átt í símasamskiptum við Sigríði Björk Guðjónsdóttur lögreglustjóra á Suðurnesjum daginn eftir að fréttir byggðar á lekanum um Tony Omos birtust í fjölmiðlum í fyrra og fengið frá henni greinargerð um málið það sama kvöld, hefur fréttastofan ítrekað óskað eftir viðtali við lögreglustjórann.

Fyrst var óskað eftir viðtali við hana þriðjudaginn 18. nóvember í síðustu viku en hún svaraði sjálf ekki símanum en sendi eftir margar ítrekanir eftirfarandi smáskilaboð.

(18 nóvember)

Sæll. Sendi tilkynningu. Næ ekki að hringja. Bestu kveðjur. SBG

í tilkynningu lögreglustjórans staðfestir hún að hafa sent Gísla Frey greinargerðina.Hins vegar hefur lögreglustjóri ekki upplýst hvers vegna hún gerði ríkissaksóknara og lögreglustjóranum á höfuðborgarsvæðinu ekki grein fyrir því að hún hafði átt þessi samskipti við Gísla Frey, eftir að hann var ákærður fyrir lekann.

Þá segir hún að það sé ekkert óvenjulegt við samskipti hennar við aðstoðarmanninn, þótt Fréttablaðið hafi greint frá því hinn 24. nóvember síðast liðinn að enginn yfirmaður l í lögreglustjóraumdæmum landsins sem blaðið ræddi við kannist við að starfsmaður ráðneytis, aðstoðarmaður ráðherra dómsmála eða ráðherra sjálfur hringi og biðji um gögn í sakamálarannsókn á vegum lögregluembættisins. Sumir lögreglustjóranna furðuðu sig á vinnubrögðum lögreglustjórans á Suðurnesjum.

Það er því full ástæða til að núverandi æðsti yfirmaður lögreglunnar á höfuðborgarsvæðinu gefi fréttastofunni færi á að taka við hana viðtal. En hér koma svör lögreglustjórans í smáskilaboðum við þeirri ósk:

(19 nóvember)

Sæll, ég tjái mig ekki meira um málið en vísa í yfirlýsingu mína frá því í gær. Góð kveðja, SBG

(24 nóvember)

Sæll, ég reyni að hafa samband síðar í dag. Bestu kveðjur, SBG

(24 nóvember)

Sæll, ég mun ekki gefa kost á mér í viðtal í dag. Bestu kveðjur, SBG

(24 nóvember)

Eigum við ekki að taka stöðuna aftur á morgun?

(25 nóvember)

Sæll, er heima með gubbandi smábarn. Ekkert viðtal mögulegt. Bestu kveðjur, SBG

(26 nóvember)

Sæll. Gef ekki kost á mér í viðtal. Takk fyrir þolinmæðina. Bestu kveðjur, SBG

Þá hefur Sigríður Björk heldur ekki hirt um að svara skriflegri fyrirspurn fréttastofunnar um þessi mál.