Norðmenn slaka á kröfum um aðgengi

Norsk stjórnvöld hafa ákveðið að slaka á kröfum um aðgengi í byggingarreglugerð í því skyni að draga úr kostnaði við smíði minni íbúða og auðvelda ungu fólki fyrstu íbúðakaup. Breytingarnar taka gildi um áramótin en tilgangurinn er að fjölga litlum íbúðum á markaði.

„Við þurfum að byggja fleiri og ódýrari íbúðir til að það verði ódýrara að komast inn á húsnæðismarkaðinn,“ segir ráðherra sveitarstjórnarmála, Jan Tore Sanner, í yfirlýsingu á heimasíðu ráðuneytisins.

Hann segir að með tímanum hafi tæknilegar kröfur aukist og gert húsnæði dýrara.  Sérstaklega sé mikilvægt að einfalda reglurnar gagnvart litlum íbúðum af þeirri stærð sem dæmigerðar eru sem fyrstu íbúðakaup.

Nýja reglugerðin veitir undanþágu frá kröfum um aðgengi fyrir helming íbúða, eins og tveggja herbergja, sem eru 50 fermetrar eða minni. Norskt byggingasamvinnufélag áætlar að stærð minni íbúða geti minnkað við þetta um 4-5 fermetra og byggingarkostnaður lækkað um milli 300 og 400 þúsund norskar krónur á hverja íbúð, eða sem nemur 5 til 7 milljónum íslenskra króna.

„Við þurfum að byggja fleiri íbúðir hraðar. Við vitum einnig að við þurfum meira húsnæði sem er aðgengilegt öllum. Með þessari lausn getum við bæði byggt fleiri íbúðir og jafnframt verða til fleiri íbúðir með aðgengi fyrir alla,“ segir ráðherrann. 

Sem dæmi um breytingar er að dregið er úr kröfum um snúningsrými hjólastóla, um lágmarksbreidd á göngum, um aðgengi að baðherbergjum, um sjálfvirkar hurðaopnanir og meiri halli verður leyfður á skábrautum og göngusvæðum, sem þýðir minni landslagsbreytingar og að hægt verður að byggja í meiri bratta.