Langþráður sigur Verona | Roma aðeins einu stigi frá toppnum

Emil Hallfreðsson lék allan leikinn fyrir Verona sem bar sigurorð af Udinese, 1-2, í ítölsku úrvalsdeildinni í fótbolta í dag. Þetta var fyrsti sigur Verona í átta leikjum.

Antonio Di Natale kom Udinese yfir á 31. mínútu, en önnur gömul kempa, Luca Toni, jafnaði fyrir Verona í uppbótartíma fyrri hálfleiks. Þetta var fimmta deildarmark þessa 37 ára gamla framherja í vetur.

Það var síðan Grikkinn Lazaros Christodoulopoulos sem skoraði sigurmark Verona strax í byrjun seinni hálfleiks.

Emil stóð fyrir sínu inni á miðjunni hjá Verona, en 79,3% sendinga íslenska landsliðsmannsins rötuðu á samherja í leiknum.

Roma minnkaði forystu Juventus á toppi deildarinnar niður í eitt stig með 0-1 sigri á Genoa á útivelli. Radja Nainggolan skoraði eina mark leiksins á 40. mínútu, en níu mínútum áður hafði samherji hans, Adem Ljajic, misnotað vítaspyrnu.

Juventus, sem gerði jafntefli við Sampdoria fyrr í dag, er með 36 stig í toppsætinu, en Roma kemur þar á eftir með 35 stig.

Þá gerðu Parma og Cagliari markalaust jafntefli, en bæði lið eru í fallsæti.