Franskir greifar verðlauna Bergsvein

Skáldsaga Bergsveins Birgissonar, Svar við bréfi Helgu, hlaut í liðinni viku bókmenntaverðlaun Cercle de l‘union interalliée í Frakklandi. Guðrún Vilmundardóttir, útgáfustjóri Bjarts, segir þetta virt verðlaun, enda engir meðalmenn sem standa að baki þeim.



„Cercle de l'Union interalliée eru samtök franskra greifa og fyrirmenna, sem voru stofnuð árið 1917,“ segir Guðrún. „Nú eru um 3.300 meðlimir í samtökunum, stjórnmálamenn, menntamenn, viðskiptajöfrar og aðrir framámenn í frönsku samfélagi. Samtökin eru til húsa við St. Honoré-götu, eina fínustu götu í París, þar sem tískuhúsin standa í röðum í skjóli Louvre-hallarinnar.“ Samtökin veita árlega bókmenntaverðlaun bókum sem eru annaðhvort skrifaðar á frönsku eða þýddar á frönsku. Í ár fengu tveir höfundar verðlaun: Hinn franski Olivier Bleys fyrir bókina Concerto pour la main morte, og Bergsveinn Birgisson fyrir Svar við bréfi Helgu sem í franskri þýðingu Catherine Eyjólfson nefnist La Lettre à Helga.



Guðrún er að vonum ánægð fyrir hönd höfundarins, sem Bjartur gefur út á íslensku. „Það þykir mikill heiður að hljóta verðlaun þessara virtu samtaka, auk þess sem höfundi eru veitt peningaverðlaun. Svona upphefð sá hann Bjarni bóndi ekki fyrir,“ segir hún.