Andrew á Louvre

Myndina tók Reuters-ljósmyndarinn Phil Noble af Andrew í Range Rover-jeppa á leið frá Aylsham-lögreglustöðinni í Norfolk þar sem hann var ellefu klukkustundir í gæsluvarðhaldi.

Aðgerðarsinnar á vegum breska hópsins Everyone Hates Elon römmuðu ljósmyndina inn með gullnum ramma, hengdu hana upp í Louvre-listasafninu í París á sunnudag og skrifuðu við hana „Hann svitnar núna“.

Myndin hékk í fimmtán mínútur með Monu Lisu og öðrum verkum eftir marga af þekktustu listamönnum heims. Hópurinn birti myndband af gjörningnum á Instagram og skrifuðu við hann: „Þau segja „Hengdu það upp á Louvre-safninu“ svo við gerðum það.“

Ratcliffe, Bezos og fleiri gerðir að skotspóni

Hópurinn Everyone Hates Elon segist beina sjónum sínum að „milljarðamæringum og stjórnmálavinum þeirra“ með ögrandi uppátækjum. 

Eitt af nýjustu uppátækjum hópsins var að leigja fyrr í mánuðinum auglýsingu á skilti við Old Trafford, heimavöll knattspyrnuliðsins Manchester United, þar sem stóð: „Innflytjendur hafa gert meira fyrir þessa borg en skattsvikaramilljarðamæringar“. 

Beindust skilaboðin að stærsta eiganda klúbbsins, Jim Ratcliffe, sem hafði skömmu fyrr sagt að innflytjendur hefðu tekið yfir Bretlandseyjar.

Sjá einnig: Ratcliffe þykir leitt að hafa „móðgað sumt fólk“

Aðgerðarsinnahópurinn leigði einnig stórt skilti á Torgi heilags Markúsar í Feneyjum á sama tíma og Jeff Bezos giftist Lauren Sánchez í borginni síðasta sumar. Þar stóð: „Ef þú getur leigt Feneyjar fyrir brúðkaupið þitt geturðu borgað meiri skatt.“

Andrew Mountbatten-Windsor, áður Andrés Bretaprins, var handtekinn síðasta fimmtudag á 66 ára afmæli sínu vegna gruns um misferli í opinberum störfum. Hann er grunaður um að hafa lekið trúnaðargögnum, meðal annars til barnaníðingsins Jeffrey Epstein, meðan hann starfaði sem sérstakur erindreki Bretlands.

Kallað hefur verið eftir því að Andrew verði sviptur erfðarétti sínum að bresku krúnunni þegar yfirstandandi lögreglurannsókn á máli hans er lokið.