Allir meistaraþjálfararnir nema einn frá 1984 yngri en fertugt

Finnur Freyr Stefánsson, þjálfari nýkrýndra Íslandsmeistara KR, lék eftir afrek Sverris Þórs Sverrissonar frá því í fyrra með því að gera lið að meisturum á sínu fyrsta ári sem þjálfari í meistaraflokki karla.

Úrslitakeppnin fór nú fram í 31. skipti og í aðeins einni af þessum úrslitakeppnum hefur þjálfari Íslandsmeistaranna verið kominn yfir fertugt. Sá var Sigurður Ingimundarson þegar hann gerði Keflavík að Íslandsmeisturum í fimmta sinn vorið 2008 þá á 42. aldursári. Sigurður var þá þegar búinn að hljóta fjóra titla sem þjálfari fyrir fertugt.

Nýju mennirnir í brúnni hafa átt Íslandsmeistarasviðið undanfarin ár. Íslandsmeistaraþjálfarnir 2010 (Ingi Þór Steinþórsson, Snæfell) og 2011 (Hrafn Kristjánsson, KR) gerðu liðin að meisturum á sínu fyrsta ári á þeim stað og Helgi Jónas Guðfinnsson, þjálfari Íslandsmeistara Grindavíkur 2013, var aðeins á sínu öðru ári með liðið og því reynslulítill eins og Finnur og Sverrir Þór.

Þegar aldur þjálfaranna í úrslitakeppninni í ár er skoðaður kemur enn fremur í ljós að þrír yngstu þjálfararnir komust lengst. Einar Árni Jóhannsson (37 ára) fór með Njarðvík í oddaleik í undanúrslitum og Finnur Freyr (30 ára) og Sverrir Þór Sverrisson (38 ára) mættust í lokaúrslitunum. Þeir voru þeir einu af átta þjálfurum í úrslitakeppninni sem voru ekki orðnir fertugir.

Finnur Freyr var samt langt frá því að ógna meti Friðriks Inga Rúnarssonar, sem var aðeins á 23. aldursári þegar hann gerði Njarðvík að Íslandsmeisturum vorið 1991. Friðrik Ingi snýr aftur í boltann næsta vetur en hann tók við liði Njarðvíkur á dögunum. Nái hann titlinum í hús myndi hann um leið bæta metið á hinum endanum og verða elsti meistaraþjálfarinn í sögu úrvalsdeildarinnar.

Friðrik Ingi verður vissulega ekki eini þjálfarinn í deildinni sem er kominn yfir fertugt. Þeir verða nokkrir eins og í ár og finnst eins og fleirum að það sé kominn tími á að þeir eldri og reyndari fái einnig að fagna þeim stóra næsta vor. Hvort það tekst verður að koma í ljós.



Aldur þjálfara Íslandsmeistara í úrslitakeppni 1984-2014

Yngri en 30 ára        8 (3 spilandi)

30 til 34 ára        12 (8 spilandi)

35 til 39 ára        12

40 ára eða eldri     1



Yngstu þjálfarar Íslandsmeistara sem voru ekki að spila líka 1984-2014

22 ára - 9 mánaða - 24 daga

Friðrik Ingi Rúnarsson, Njarðvík 11. apríl 1991

27 ára - 9 mánaða - 24 daga

Friðrik Ingi Rúnarsson, Grindavík 11 apríl 1996

27 ára - 11 mánaða - 16 daga

Ingi Þór Steinþórsson, KR 25. apríl 2000

29 ára - 3 mánaða - 9 daga

Einar Árni Jóhannsson, Njarðvík 17. apríl 2006

29 ára - 10 mánaða - 1 daga

Friðrik Ingi Rúnarsson, Njarðvík 19. apríl 1998

30 ára - 6 mánaða - 2 daga

Finnur Freyr Stefánsson, KR 1. maí 2014

30 ára - 9 mánaða - 23 daga

Sigurður Ingimundarson, Keflavík 6. apríl 1997