Alonso er varaskeifa Mercedes

Mercedes myndi leita samninga við Fernando Alonso fyrir tímabilið 2016 ef ekki tekst að semja við núverandi ökumann liðsins og heimsmeistara, Lewis Hamilton.

Mercedes og Hamilton hafa ekki komist að samkomulagi um famlengingu á samningi lengra en til loka komandi tímabils.

Toto Wolff, keppnisstjóri Mercedes vonaðist til að það tækist að ljúka samningum í desember en það tókst ekki. Hann er þó enn bjartsýnn á að samningar takist.

„Það liggur ekkert á ennþá, við munum ræða þetta á tímabilinu,“ sagði Wolff aðspurður um stöðu samningaviðræðanna.

Wolff hefur þegar ákveðið hvaða ökumenn hann ætlar að tala við, Alonso er þar efstur á lista. Spánverjinn samndi nýverið við McLaren. Sá samningur er til margra ára en líklega er ákvæði í honum sem heimilar Alonso að hverfa á brott ef bíllinn er ekki nógu góður.

„Ég er bjartsýnn á að okkur takist að hala núverandi ökumönnum. Takist það ekki er Alonso besti kosturinn, á eftir honum Valtteri Bottas,“ sagði Wolff.

„Hann er hættulegur andstæðingur í öllum bílum, ef hann er í bíl sem getur aðeins náð sjötta sæti tekst honum samt að enda í þriðja,“ sagði Wolff um Alonso.