Honda má eftir allt þróa sína vél

Aðrir vélaframleiðendur höfðu fengið leyfi til að þróa sína vél á komandi tímabili. Galli fannst í reglum þar sem það vantaði dagsetningu sem átti að binda enda á þróun véla fyrir tímabilið.

Honda er hins vegar að smíða fyrstu 1,6 lítra Formúlu 1 vélina sína. Þess vegna varð Honda að skila lokahönnun fyrir 28. febrúar næstkomandi líkt og aðrir gerðu þegar vélarnar voru fyrst smíðaðar í fyrra.

FIA (alþjóða akstursíþróttasambandið) hefur nú gefið eftir af sanngirnisástæðum og ætlar að leyfa Honda að þróa sínar vélar yfir tímabilið.

Honda mun þá hafa sömu tækifæri til að þróa sínar vélar og Ferrari, Mercedes og Renault.