Nigel de Jong hetja AC Milan í bikarnum

Hollendingurinn Nigel de Jong tryggði AC Milan sæti í átta liða úrslitum ítölsku bikarkeppninnar í kvöld þegar hann skoraði sigurmark liðsins aðeins fjórum mínútum fyrir leikslok.

AC Milan vann þarna 2-1 sigur á Sassuolo á heimavelli og hefndi fyrir tap á móti Sassuolo í deildinni á sama stað í fyrsta leik liðanna á nýju ári.

Nigel de Jong skoraði markið þegar hann fylgdi vel á eftir sláarskoti félaga síns Andrea Poli. Giampaolo Pazzini kom AC Milan yfir á 38. mínútu en Nicola Sansone jafnaði fyrir Sassuolo með marki úr vítaspyrnu á 63. mínútu.

AC Milan er fyrsta liðið sem kemst áfram í átta liða úrslitin en leikirnir í sextán liða úrslitunum fara fram á næstu tveimur vikum.