Emil í sigurliði

Emil Hallfreðsson lék allan leikinn þegar Verona bar sigurorð af Atalanta í ítölsku úrvalsdeildinni í fótbolta í dag.

Argentínski framherjinn Javier Saviola skoraði eina mark leiksins á 53. mínútu en þetta var annar sigur liðsins í síðustu þremur leikjum.

Verona er í 13. sæti deildarinnar með 24 stig, sex stigum frá fallsæti.

Emil átti góðan leik á miðjunni hjá Verona en 90% af sendingum hans í leiknum rötuðu á samherja samkvæmt tölfræðisíðunni Whoscored.com. Emil fékk að líta gula spjaldið fjórum mínútum fyrir leikslok.

Hörður Björgvin Magnússon sat allan tímann á varamannabekknum þegar Cesena vann 1-2 sigur á botnliði Parma.

Cesena er þó enn í 19. og næst neðsta sæti deildarinnar, sjö stigum frá öruggu sæti.

Þá vann topplið Juventus sigur á Chievo með tveimur mörkum gegn engu. Paul Pogba og Stephan Lichtsteiner skoruðu mörk ítölsku meistaranna sem eru með átta stiga forystu á toppi deildarinnar. Roma getur minnkað forskotið niður í fimm stig með sigri á Fiorentina á útivelli í kvöld.

Úrslit dagsins:

Sampdoria 1-1 Palermo

Inter 0-1 Torino

Verona 1-0 Atalanta

Parma 1-2 Cesena

Juventus 2-0 Chievo