RadioShack sækir um gjaldþrotaskipti

Raftækjaverslanakeðjan RadioShack hefur sótt um gjaldþrotaskipti og mun selja 2.400 af fjögur þúsund verslunum sínum. Hinum verður að öllum líkindum lokað, en fyrsta verslun fyrirtækisins var opnuð árið 1921.

Á vef CNN kemur fram að þessi ákvörðun komi ekki á óvart ytra eftir að kauphöllin í New York stöðvaði viðskipti með hlutabréf fyrirtækisins á mánudaginn.

Hnignun RadioShack á sér langa sögu og hefur sala fyrirtækisins versnað ár frá ári um langt skeið. Í síðasta ársfjórðungsuppgjöri fyrirtækisins kom í ljós að sölutekjur fyrirtækisins hafði minnkað um 16 prósent á milli ára.

Í upphafi síðasta árs lenti fyrirtækið í vandræðum með lausafé og sat uppi með fimm þúsund verslanir í Bandaríkjunum. Í mars var tilkynnt að til stæði að loka um 1.100 verslunum, en vegna mikils kostnaðar við slíkar aðgerðir tókst RadioShack einungis að loka 175 verslunum.