Vilja ekki fleiri brottvísanir fyrr en hælismeðferðin verði bætt

Síðdegis í dag verður mótmælaganga flóttamanna frá Hlemmi til Lækjartorgs. Hún hefst klukkan tvö. Þar verða flóttamenn sem eru nú í hælismeðferð, bæði úr þeim hópi sem er búsettur í Reykjavík sem og í Reykjanesbæ.

Í tilkynningu frá samtökunum Ekki fleiri brottvísanir segir að flóttamenn sem koma sjálfir til Íslands hafa sætt ótrúlega slæmri meðferð af hálfu yfirvalda.

„Fyrir utan langa biðtíma, slæmar aðstæður á gistiheimilinu Fit, mismunun af hálfu lögreglu, niðurlægjandi viðmót Útlendingastofnunar og gegndarlausar brottvísanir hefur þeim verið bannað að vinna og þátttaka í samfélaginu mjög torvelduð. Þetta er salt í sárin fyrir marga þeirra sem hafa verið á flótta árum eða áratugum saman. Sífelld óvissa um eigin örlög er olía á eld sálrænna kvilla,“ segir í tilkynningunni.

Þar segir einnig að í ljósi þessarar útskúfunar, bágrar íslenskukunnáttu flóttamanna og ótta þeirra við að falla í ónáð fólks sem ráði örlögum þeirra hafi reynst erfitt að koma þessum aðfinnslum á framfæri.

„Við mótmælum þessum vondu aðstæðum, hvetjum til bóta og krefjumst þess að ekki verði fleiri brottvísanir fyrr en hælismeðferðin hefur verið bætt til muna.“