Fær 2,24 milljarða fyrir að hætta hjá Sauber

Formúlu 1 ökumaðurinn Giedo van der Garde og Sauber liðið hafa náð samkomulagi um starfslok ökumannsins, en það var ekki ókeypis fyrir liðið. Það greiðir honum 16 milljónir dollara fyrir að hætta, eða 2,24 milljarða króna.

Sauber liðið hafði áður ákveðið að þeir tveir ökumenn sem ækju fyrir liðið á nýhöfnu keppnistímabili yrðu Marcus Ericsson og Felipe Nasr. Hinsvegar var Giedo van der Garde með samning undir höndum frá Sauber liðinu um að hann yrði ökumaður þeirra á þessu keppnistímabili, en Sauber vildi ekki virða hann.

Því fór Giedo í mál við Sauber fyrir svissneskum dómstólum, en það er heimaland Sauber liðsins, og vann það. Í stað þess að Sauber setti Giedo í ökumannssæti annars bíls síns var ákveðið að semja um bætur fyrir sætismissinn.

Eftir að hafa eytt síðustu 4 árum sem reynsluökumaður fyrir Spyker, Force India, Caterham og Sauber og einu ári sem keppnisökumaður fyrir Caterham hefur Giedo viðurkennt að ferli hans sem Formúlu 1 ökumaður sé líklega lokið. Hann getur þó huggað sig við peninginn, sem myndi duga flestum til æviloka.