Vettel: Það kom á óvart hversu fljótir Mercedes voru í dag

Hver sagði hvað eftir tímatökuna í Kína? Lewis Hamilton á Mercedes náði ráspól í fimmta skipti.

„Kína heldur áfram að reynast mér vel og bíllinn er góður og mun betri en í Malasíu. Við lærðum mikið í síðustu keppni að það væri of langt mál að telja það allt upp. Liðið hefur staðið sig vel í að koma með góðar uppfærslur hingað sem virka vel,“ sagði Hamilton.

„Þetta voru fjórir hundruðustu og þá er maður eðlilega fúll að hafa ekki náð ráspól. Það var ekki mikill munur á okkur,“ sagði Nico Rosberg eftir tímatökuna.

„Gekk vel í dag, við reyndum nýja áætlun í þriðju lotu. Það kom á óvart hversu fljótir Mercedes voru í dag. Við teljum okkur eiga meiri möguleika á morgun. Vonandi getum við átt góða keppni,“ sagði Sebastian Vettel eftir tímatökuna.

„Við vildum reyna að keppa við Ferrari í dag og það er það sem við gerðum. Við vorum með þá króaða af en svo kom Vettel og skemmdi það fyrir okkur,“ sagði Pat Symonds keppnisstjóri Williams.

„Við vissum að þetta yrði erfitt en ég er mjög ánægður með árangur dagsins. Við munum reyna að berjast við Sebastian í keppninni,“ sagði Felipe Massa á Williams sem varð fjórði í tímatökunni.

„Ég átti erfitt með stöðugleika á afturenda bílsins þegar leið á tímatökuna. Það gæti verið erfitt að keppa við Ferrari í keppninni,“ sagði Valtteri Bottas sem varð fimmti í tímatökunni.

„Ég átti bara erfiðan hring, ég náði litlu gripi að aftan í byrjun hringsins. Við erum með mjög góðan pakka en það kemur alltaf eitthvað upp,“ sagði Kimi Raikkonen á Ferrari sem mun ræsa sjötti á morgun.

Bein útsending hefst frá keppninni hefst á Stöð 2 Sport klukkan 5:30 í fyrramálið.

Hér fyrir neðan má sjá gagnvirkt kort af brautinni í Sjanghæ og niðurstöðu tímatökunnar.