Markaðsmisnotkunarmálið: „Við ráðum ekki verðinu á svona degi“

„Gleðilegt sumar!” sagði Arngrímur Ísberg, dómsformaður, þegar 4. dagur aðalmeðferðar í markaðsmisnotkunarmáli Kaupþings hófst í morgun.

 

Birnir Sær Björnsson situr nú fyrir svörum Björns Þorvaldssonar, saksóknara. Birnir var starfsmaður eigin viðskipta Kaupþings á því tímabili sem ákæran nær til, frá 1. nóvember 2007 til 8. október 2008.

 

Hann er ákærður fyrir að hafa keypt mikið af hlutabréfum í bankanum með það að augnamiði að halda verði bréfanna uppi. Á hann að hafa gert þetta að undirlagi yfirmanna sinna, meðal annars þeirra Ingólfs Helgasonar, forstjóra Kaupþings á Íslandi, og Einars Pálma Sigmundssonar, forstöðumanns eigin viðskipta bankans.

„Leyfum því að sunka ef það er í lagi“

Saksóknari spyr Birni nú út úr viðskiptum með hlutabréf í Kaupþingi á einstökum dögum á ákærutímabilinu. Eru honum sýndar myndir og tölur úr kauphallarhermi auk þess sem borin eru undir hann símtöl og tölvupóstar.

 

Nokkuð ljóst er af gögnum málsins að Ingólfur Helgason fylgdist náið með starfi eigin viðskipta Kaupþings og þeim starfsmönnum deildarinnar sem stunduðu viðskipti með bréf í bankanum. Símtal á milli Ingólfs og Birnis frá 5. desember 2007 var spilað:

 

Birnir: „Við ætlum að vera víðir á því [...].”

Ingólfur: „Já.”

Birnir: „Opna niður og leyfum því að sunka ef það er í lagi.”

Ingólfur: „Já, við ráðum ekki verðinu á svona degi, það er ljóst maður.”

 

Björn spurði Birni hvað hann ætti við með því „að vera víðir á því.”

 

„Mér sýnist ég bara vera að tala um tilhögun tilboða við opnun markaða [í hlutabréf Kaupþings] og hafa langt á milli þeirra. Það hefur eitthvað gerst þarna, einhverjar fréttir á markaði, sem kalla á óvissu,” svaraði Birnir.

Tölvupóstar um kaup dagsins

Þá var hann spurður hvað Ingólfur ætti við með „við ráðum ekki verðinu á svona degi.” Birnir sagðist ekki átta sig á hvað hann meinti, saksóknari yrði að spyrja Ingólf að því. Björn spurði þá hvort að Birnir hafi einhvern tíma talið að þeir væru að ráða verðinu í bréfum Kaupþings. Svaraði hann því neitandi.

Fjöldi tölvupósta frá því í desember 2007 og janúar 2008 hafa verið bornir undir Birni. Í þeim upplýsir hann Ingólf og Einar Pálma um kaup dagsins í hlutabréfum Kaupþings. Aðspurður sagðist Birnir líklegast hafa sent slíka tölvupósta samkvæmt fyrirmælum yfirmannanna.

„Láttu vaða aðeins í þetta“

Komið hefur fram að bæði Birnir og samstarfsmaður hans, Pétur Kristinn Guðmarsson, sem einnig er ákærður í málinu, hafi að vissu leyti haft nokkrar áhyggjur af hversu mikið bankinn var að kaupa í sjálfum sér. Í einu af símtölum Birnis við Ingólf Helgason frá því í janúar 2008 viðrar hann þessar áhyggjur sínar.

Ingólfur: „Hvað ertu búinn að taka inn á í dag?”

Birnir: „Í dag er ég búinn að taka alltof mikið.”

[...]

Ingólfur: „Láttu vaða aðeins í þetta. Það kemur þá bara inn á okkur.”

Birnir: „Ókei, ég verð bara sterkur.”

Ingólfur: „Já, við skulum vera tiltölulega sterkir.”

 

Saksóknari spurði Birni hvað þeir forstjórinn hafi verið að ræða.

 

„Við erum að tala um Kaupþingsbréf. Mér finnst ég hafa keypt of mikið.”

 

Aðspurður hvort um hans mat á stöðunni sé að ræða svaraði Birnir að það væri greinilegt. Hann geri hins vegar ráð fyrir að í símtalinu sé Ingólfur að ræða við hann um að kaupa enn meira af bréfum í bankanum.

 

Dagskrá gerir ráð fyrir að Birnir sitji fyrir svörum í dag og næstkomandi mánudag.