Fyrr­verandi for­stjóri óttast að fé­lagið verði keypt og lagt niður

Greint var frá því í morgun að gengi hlutabréfa í flestum félögum Kauphallarinnar hefði lækkað frá því að markaðir lokuðu á föstudag. Athygli vakti að gengi bréfa í Icelandair hafði lækkað um 1,43 prósent en það stóð í aðeins 0,69 krónum.

Jón Karl lýsti yfir áhyggjum af stöðu félagsins í Reykjavík síðdegis. Þá furðaði hann sig á verðlagningu félagsins, sem hann telur markaðinn vanmeta. 

„Ég skil ekki alveg hvernig verðlagning á félaginu er, af því að upplausnarvirði félagsins hefur í mörg ár verið hærra heldur en markaðsvirðið. Og miðað við þessar tölur, þá er það núna sinnum þrír eitthvað svoleiðis. Það er náttúrulega með ólíkindum að markaður skuli ekki verðleggja þetta öflugt félag, kannski ekki óháð rekstri en miðað við eignastöðu, stöðu fjármuna og fleira.“

Flugfargjöld ekki lengur lúxusvara

Aðspurður hvers vegna markaðurinn hafi ekki meiri trú á félaginu segir hann ýmsar skýringar á því. Til að mynda hafi undanfarin rekstrarár ekki verið góð. 

„Félagið hefur ekki borgað arð í níu ár. Og það er auðvitað þannig að ef þú átt pening í dag og getur valið á milli kaupa í bönkunum eða félögum sem að borga eðlilegan og reglulegan arð, þá er ekkert óeðlilegt að fjárfestar líti aðeins undan og og fari þá frekar þangað þar sem þú ert þó að fá eitthvað fyrir það sem þú leggur inn,“ segir Jón Karl. 

Þá nefnir hann kórónuveirufaraldurinn og samkeppnisstöðu, sem sé líkt og áður hefur veirð fjallað um, ósjálfbær og takmarki verðlagsmöguleika félagsins. 

„Við höfum rætt það áður að flugfargjöld eru í eðli sínu lág, þó að okkur finnist það í sjálfu sér ekki. En í öllu sögulegu samhengi og horft til baka, þá eru flugfargjöld, sem voru áður munaðarvara, eru í dag bara orðin svokallað commodity eða neysluvara. Fólk kaupir bara það ódýrasta á markaði.“

Ríkið „ekki sérstaklega góður“ rekstraraðili

Um það hvort ríkið ætti að gerast eigandi Icelandair segir Jón Karl það pólitíska spurningu. Evrópuríki hafi þó að undanförnu leitast við að koma flugfélögum úr ríkiseigu og yfir á markað. 

„Almennt finnst mér persónulega ekki ríkið sérstaklega góður rekandi á fyrirtækjum,“ segir Jón Karl.

Er raunveruleg hætta á því að einhver aðili kaupi fyrirtækið, leggi það niður og selji eignir og græði?

„Það er raunveruleg hætta þegar markaðsverð er langt undir upplausnarverði. Já, svarið er einfaldlega já. Það er bara eðli hins almenna markaðar að þegar fyrirtæki eru verðlögð langt undir einhvers konar raunvirði, getum við kallað það, þá er auðvitað í raun ákveðin hætta á því.“

Hann bendir þó á að um leið og slíkar þreifingar færu af stað myndi gengi félagsins að öllum líkindum rjúka upp. 

Viðtalið í heild sinni má nálgast hér að neðan.