Róbert sterkur og Hansen óstöðvandi í sigri PSG

Franska stórliðið PSG lenti í miklum erfiðleikum gegn Créteil í kvöld en hafði að lokum sigur, 35-31.

Creteil leiddi í hálfleik, 14-15, og síðari hálfleikur var æsispennandi. Jafnt var á með liðunum er tíu mínútur lifðu leiks en PSG var sterkara á lokasprettinum.

Róbert Gunnarsson átti frábæran leik í liði PSG í kvöld og skorað fimm mörk úr fimm skotum. Mikkel Hansen var óstöðvandi í liði PSG og skoraði 13 mörk.

PSG er eftir sem áður í öðru sæti frönsku deildarinnar og er nú þrem stigum á eftir Montpellier.