„Nei,” „Ég veit það ekki,” „Ég man það ekki,” „Þú verður að spyrja þá,” og „Þú verður að spyrja Magnús.” Svona hefur Ingólfur Helgason, fyrrverandi forstjóri Kaupþings á Íslandi, svarað flestum spurningum Björns Þorvaldssonar, saksóknara í Héraðsdómi Reykjavíkur í morgun.
Ingólfur er einn af níu fyrrverandi starfsmönnum og stjórnendum Kaupþings í markaðsmisnotkunarmáli sérstaks saksóknara gegn þeim. Í gær lauk skýrslutöku yfir Ingólfi vegan fyrsta kafla ákærunnar sem snýr að miklum kaupum bankans á hlutabréfum í sjálfum sér.
Í dag var því komið að öðrum og þriðja hlut ákærunnar sem snúa að hlutabréfakaupum þriggja eignarhaldsfélaga í Kaupþingi en bankinn sjálfur seldi félögunum bréfin og fjármagnaði þau að fullu, að því er kemur fram í ákæru.
Kaupin talin byggð á blekkingu og sýndarmennsku
Félögin þrjú, Holt Investment, Mata og Desulo Trading, keyptu yfir 40 milljón hluti í Kaupþingi frá febrúar til september 2008. Saksóknari vill meina að kaup félaganna hafi byggt á blekkingum og sýndarmennsku og hafi verið líklegt til þess að gefa eftirspurn eftir hlutabréfum í Kaupþingi ranglega og misvísandi til kynna.
Ingólfur er ákærður fyrir hlutdeild sína í sölu bréfanna og hlutdeild í lánveitingum bankans til félaganna sem keyptu bréfin. Í morgun hefur hann gengist við því að hafa komið að einhverju leyti að viðskiptum félaganna með bréf í Kaupþingi.
Forstjórinn fyrrverandi man hins vegar lítið nákvæmlega hvaða viðskiptum hann kom að, hver hafði frumkvæði að hvaða viðskiptum og hver ákvað magn og verð þeirra.
Hann hefur hins vegar ítrekað neitað því að hafa haft einhverja aðkomu að lánveitingunum til félaganna. Hefur Ingólfur sagt að heimildir hans til lánveitinga hafi verið afar takmarkaðar. Að sama skapi hefur hann ítrekað neitað því að hafa vitað eitthvað um það að bankinn sjálfur hafi fjármagnað hlutabréfakaup félaganna þriggja.
Hreiðar Már hafði yfirsýn og „eflaust“ Sigurður
Vegna þessa segist Ingólfur ekki hafa haft yfirsýn yfir kaup og sölu Kaupþings á hlutabréfum í sjálfu sér og lánveitingar vegna slíkra bréfa. Björn spurði hverjir gætu hafa haft þá yfirsýn.
„Einhverjir fyrir ofan mig,” svaraði Ingólfur.
Saksóknari spurði þá hverjir.
„Forstjórinn [Hreiðar Már Sigurðsson], lánanefnd, stjórn...” Hann var þá spurður hvort að stjórnarformaðurinn, Sigurður Einarsson, hefði haft slíka yfirsýn. Svaraði Ingólfur því að hann hefði eflaust haft slíka yfirsýn.
Skýrslutöku yfir Ingólfi lauk rétt fyrir hádegi, hálfum degi á undan áætlun. Dómþingi var því slitið en aðalmeðferðin heldur áfram á mánudagsmorgun. Þá kemur Hreiðar Már Sigurðsson, fyrrverandi forstjóri Kaupþings, fyrir dóminn en hann afplánar nú fangelsisdóm vegna Al Thani-málsins.
Yfirheyrslu yfir Ingólfi lokið sem átti svör við fæstum spurningum saksóknara

Tengdar fréttir

Markaðsmisnotkunarmálið: "Við skulum mynda verðið eins og fyrri daginn”
Saksóknari bar fjölmörg ummæli Ingólfs Helgasonar frá ákærutímabilinu undir hann í dag.

Markaðsmisnotkunarmálið: „Þetta eru bara einhverjir aulabrandarar okkar á milli“
Saksóknari spurði Ingólf Helgason hver þessi „dauði köttur” hefði verið.

Markaðsmisnotkunarmálið: Var ekki einvaldur í Kaupþingi
„Ég hef klárlega gefið starfsmönnum fyrirmæli en þetta voru ekki alltaf einhver einhliða fyrirmæli frá mér og eiginlega bara alls ekki. Þetta var sameiginleg ákvarðanataka,“ segir Ingólfur Helgason.

Markaðsmisnotkunarmálið: Leitaði frekar til Sigurðar en Hreiðars Más
"Ég setti stefnuna um hvað bankinn ætti að eiga mikið hverju sinni. Hreiðar og Sigurður fólu mér að annast þessi viðskipti, sjá um þessa deild, en dagleg samskipti við þá voru ekki mikil,” segir Ingólfur Helgason.