Hamburg með danskt hornapar á næsta tímabili

Danski hornamaðurinn Casper U. Mortensen hefur samið við þýska úrvalsdeildarliðið HSV Hamburg.

Mortensen, sem er 25 ára, kemur frá SönderjyskE í heimalandinu en hann lék með liðinu seinni hluta vetrar eftir að hafa komið frá Bjerrinbro-Silkeborg.

Mortensen skrifaði undir þriggja ára samning við Hamburg þar sem hann hittir fyrir landa sína, Allan Damgaard og Hans Lindberg.

Hamburg lenti í 9. sæti á nýafstöðnu tímabili en liðið hefur verið í miklum fjárhagskröggum að undanförnu.