Fjölmiðlanefnd skoðaði gögn tengd DV í ljósi frétta um fjárkúgun

Starfsmenn Fjölmiðlanefndar fóru yfir samruna Vefpressunnar ehf. og DV ehf. í ljósi fregna dagsins af fjárkúgunartilraunum systranna Malínar Brand og Hlínar Einarsdóttur gegn Sigmundi Davíð Gunnlaugssyni forsætisráðherra.

Vísir hefur greint frá því að að efni fjárkúgunarkröfu systranna gegn ráðherranum tengist meintum viðskiptum hans við Björn Inga Hrafnsson, eiganda DV, sem áttu að tengjast kaupum á fjölmiðlinum. Björn Ingi sendi frá sér yfirlýsingu fyrr í dag þar sem hann sagði forsætisráðherra ekki hafa fjármagnað kaup á DV.

Sjá einnig:Birgitta vill svör um hin meintu spillingarmál forsætisráðherra

„Við skoðuðum þetta, rifjuðum málið upp og þá var það eins og minni okkar hafði verið að við höfðum óskað eftir þessum upplýsingum eins og við gerum,“ segir Elfa Ýr Gylfadóttir, framkvæmdastjóri Fjölmiðlanefndar, í samtali við Vísi um málið.

Óskuðu eftir upplýsingum um eignarhald og yfirráð

Hún segir Fjölmiðlanefnd hafa á sínum tíma óskað eftir öllum upplýsingum um bæði eignarhald og yfirráð Vefpressunnar ehf. í ljósi samrunans við DV ehf.

„Og með yfirráðum þá tekur það til þess hvort það sé einhver annar sem getur haft afgerandi áhrif á rekstur og stjórnun fyrirtækisins. Annað hvort sameiginlega eða sjálfstætt. Þá var tiltekið að þetta gæti verið einhver sem gæti haft áhrif á skipun stjórnar atkvæðagreiðslu og svo framvegis. Við óskuðum eftir því hvort í gildi væru hluthafasamkomulag, lánasamningar eða annað sem fellur undir slíka skilgreiningu og svörin sem við fengjum voru þau að það væru engir slíkir samningar, eða annað sem varðar yfirráð,“ segir Elfa.

Hún segir forsvarsmenn fyrirtækisins hafa staðfest með tölvupósti að svo væri ekki.

„Við óskuðum eftir því hvort þetta sé með þessum hætti. Við vorum búin að fá öll gögn um eignarhaldið og það er allt skilmerkilega getið um það á heimasíðu okkar. Það kom staðfesting á að það væru engir slíkir samningar. Við getum birt upplýsingar um eignarhald en það eru ekki skýr fyrirmæli í lögunum um það að okkur sé heimilt að birta upplýsingar um yfirráð. Við getum spurt um það en okkur er ekki heimilt að birta það. “

„Hafa ekki borist nein gögn“

Aðspurð hvort nánar verður farið yfir samruna Vefpressunar ehf. og DV ehf. segir hún engin gögn hafa borist nefndinni sem gefa tilefni til slíkrar skoðunar.

„Ef það berast einhver önnur gögn, ef það kemur eitthvað annað upp sem gæfi ástæðu til að skoða málið aftur, en það hafa ekki borist nein slík gögn, við höfum ekki séð neitt slíkt. “

Hún segir Fjölmiðlanefnd geta haft skoðun en þá verði að liggja fyrir rökstuddur grunur.

„Við vitum ekkert meira. Við getum ekki farið í málin á grundvelli einhvers sem við heyrum bara út í bæ. Við verðum að fá eitthvað.“