Hamilton styður breytta ræsingu

Lewis Hamilton segist styðja nýja reglu sem hefur það að markmiði að gera ræsingar erfiðari.

Reglan á að takmarka upplýsingar sem lið má veita ökumanni sínum og gera hlutverk ökumanns meira í ræsingunni sjálfri.

Núverandi ferli er ákvarðað af liðinu, ökumaðurinn fær upplýsingar á leið í ræsingu, bæði á hringnum frá þjónustusvæðinu að rásmarki og á upphitunnarhringnum. Upplýsingarnar lúta að því hvernig ökumaður geti bætt ræsinguna sína.

Þessar upplýsingar verða bannaðar frá og með belgíska kappakstrinum í ágúst. Bannið er hluti af áætlun um að gera bílana erfiðari í akstri meðal annars með því að gera ræsingar ófyrirsjánalegri.

„Þetta snýst aðeins um útfærsluna. Ég er sáttur við breytinguna, því meiri stjórn sem við fáum því betra,“ sagði Hamilton.

„Í dag sleppum við kúplingunni og frammistaða hennar er ákvörðuð af liðinu. Liðið segir þér hvort þú eigir að hækka eða lækka togið og ýmislegt annað. Stundum reikna verkfræðingarnir þetta vitlaust og stundum ekki,“ bætti heimsmeistarinn við.

Hamilton kveðst sakna ræsinganna úr Formúlu 3 þar sem hefðbundun kúpling var notuð.

„Það voru skemmtilegar ræsingar vegna þess að ég hafði stjórnina, ef það verður staðið rétt að þessu í F1 gæti það orðið skemmtilegt,“ sagði Hamilton að lokum.