Tékkland komið á EM | Tyrkland skaust upp fyrir Holland með öruggum sigri

Tyrkland skaust upp fyrir Holland í A-riðlinum í undankeppni Evrópu með 2-0 sigri í Tyrklandi í dag. Tyrkland er með tveggja stiga forskot á Holland í baráttunni um 3. sætið þegar tvær umferðir eru eftir.

Hollendingar eru í hættu á því að missa af EM á næsta ári eftir tapið, aðeins ári eftir að hafa nælt í brons á Heimsmeistaramótinu í Brasilíu.

Oguzhan Ozyakup kom Tyrklandi yfir í upphafi leiks og Arda Turan, leikmaður Barcelona, bætti við öðru marki stuttu fyrir hálfleik.

Hollendingar reyndu að færa sig framar á völlinn en náðu ekki að saxa á forskot Tyrkja sem unnu að lokum verðskuldaðan sigur.

Í hinum leik riðilsins tryggðu Tékkar sér sæti á lokakeppni EM með naumum 2-1 sigri á Lettlandi í Riga, höfuðborg Lettlands.

David Limbersky kom Tékklandi yfir og Vladimir Darida bætti við öðru marki um miðbik seinni hálfleiks. Lettar náðu að minnka muninn í seinni hálfleik en lengra komust þeir ekki.

Wales missti af tækifærinu til þess að gulltryggja sæti á lokakeppni EM í 0-0 jafntefli gegn Ísrael í kvöld. Með sigri hefði Wales tryggt sæti sitt í lokakeppninni en Ísraelum tókst að taka stig frá Wales.

Þá vann Noregur góðan 2-0 sigur á Króatíu í Osló en með sigrinum skaust Noregur upp fyrir Króatíu í H-riðlinum. Ítalía getur komist aftur upp fyrir Noreg með sigri í kvöld en þessi þrjú lið berjast um efstu tvö sætin sem gefa þátttökurétt á lokakeppninni næsta sumar.

Úrslit dagsins:

Lettland 1-2 Tékkland

Malta 2-2 Azerbaidjan

Noregur 2-0 Króatía

Tyrkland 2-0 Holland

Wales 0-0 Ísrael