Pastor Maldonado áfram hjá Lotus 2016

Lotus liðið hefur staðfest að Pastor Maldonado haldi sæti sínu hjá liðinu á næsta ári. Enn er óvíst hver verður liðsfélagi hans.

Maldonado hefur einungis náð 12 stigum á tímabilinu. Núverandi liðsfélagi hans, Romain Grosjean hefur náð 38 stigum. Maldonado hefur einungis lokið fimm keppnum af 13 á tímabilinu.

„Það er jákvætt fyrir framtíð liðsins að við getum staðfest opinberlega að Pastor Maldonado mun aka áfram fyrir okkur á næsta tímabili,“ sagði einn eiganda liðsins, Gerard Lopez.

„Það munu allir í verksmiðjunni í Enstone staðfesta að Pastor er frábær manneskja að vinna með og við þekkjum öll hæfileika hans á kappakstursbrautinni,“ bætti Lopez við.

„Pastor kom til okkar á margra ára samning svo þessi staðfesting er okkar leið til að sýna áframhaldandi traust til hans. Vonando getum við tilkynnt fleiri jákvæðar ákvarðarnir á næstunni,“ sagði Lopez að lokum.

„Það er frábært að liðið getur staðfest sæti mitt á næsta ári,“ sagði Maldonado.

„Miklar getgátur hafa verið um framtíðina en á meðan hef ég einbeitt mér að vinnu minni á brautinni og það er gott að framtíðin er ljós,“ hélt Maldonado áfram.

„Þetta tímabil hefur verið erfitt en gæði fólksins í Enstone hafa skinið í gegn. Mér líður eins og einn af fjölskyldunni og ég hlakka til að byggja ofan á vinnu þessa árs og skila betri úrslitum árið 2016,“ sagði Maldonado að lokum.