Strákarnir okkar eru nú þegar komnir á EM 2016 í Frakklandi en stefna að því að vinna síðustu tvo leikina til að eiga möguleik á að vera í þriðja styrkleikaflokki þegar dregið verður í riðlakeppni Evrópumótsins.
Sjá einnig:Gylfi Þór: Ekki hægt að setjast á rassinn og hætta að vinna fyrir liðið
"Það er undir okkur komið hvernig við tæklum þetta. Þetta er spurning um sigurhefðina. Við viljum halda áfram að vinna því þá komum við í góðu skapi og á skriði inn á EM," sagði Aron Einar.
"Svo erum við bara allir atvinnumenn og viljum allir vinna. Ef þú vilt ekki klára undankeppnina hérna heima á sigri er eitthvað að. Maður finnur fyrir minni pressu, en ekki þeirri pressu sem við setjum á okkur sjálfir. Við erum ekki svo góðir að við getum farið að slappa af. Það kemur ekki til greina," sagði fyrirliðinn ákveðinn.
Það getur verið mikilvægt fyrir íslenska liðið að vera í þriðja styrkleikaflokki og fá eina "lakari" þjóð fyrir aftan sig í riðlinum á EM. Einn sigur getur fleytt liðum ansi langt á 24 þjóða mótum þar sem 16 komast upp úr riðli.
"Um leið og við mættum byrjaði Heimir að predika að við værum ekkert það góðir að við gætum slappað af og haldið þetta komi að sjálfu sér. Einn sigurleikur á EM getur skipt sköpum og því þurfum við að pæla í þessu öllu," sagði Aron Einar.
"Við erum ekki saddir. Við erum enn að bæta okkur sem landslið og það þurfum við að muna. Það eru enn hlutir sem Lars og Heimir eru að vinna í."
Aron verður ekki með gegn Lettum þar sem hann er í leikbanni. Annars er hann vanur að spila alla landsleiki og reyndar alla leiki með félagsliðum sínum líka.
Þessi kraftmikli Akureyringur hefur verið fastamaður í byrjunarliði sinna félaga nánast frá því hann var 17 ára gamall, en svo er ekki núna. Aron hefur ekki byrjað einn leik með Cardiff í ensku B-deildinni og aðeins spilað 35 mínútur.
Hann viðurkennir að það var sérstök tilfinning að mæta til Cardiff eftir gleðina í kringum leikinn við Kasakstan þar sem Ísland tryggði sér farseðilinn til Frakklands.
"Þetta kom manni niður á jörðina. Ég fór úr því að koma Íslandi á lokakeppni EM í fyrsta sinn í það að spila með U21 árs liði Cardiff. Það var spes. En þetta er bara hluti af boltanum," sagði Aron Einar sem leggur þó ekki árar í bát. Ekki að nokkrum hefði dottið það í hug.
"Ég lít á þessa stöðu sem tíma fyrir mig til að bæta það sem ég þarf að bæta. Auðvitað vill maður vera í spilformi og spila alla leiki en því miður er staðan ekki þannig hjá mér núna. Ég leggst samt ekkert niður og fer að grenja og tuða."
"Ég þarf að vinna mér inn sætið í liðinu aftur sem ég missti á undirbúningstímabilinu þegar ég meiddist. Ég er samt bara góður og jákvæður enn þá. Það hafa allir gengið í gegnum þetta á sínum ferli og þetta er bara eitthvað sem ég þarf að tækla."
Hann segir það gott að komast úr umhverfinu hjá Cardiff eins og staðan hjá sér er núna og koma til móts við íslenska landsliðið.
"Maður getur varla beðið eftir að koma í hvert sinn og taka þátt í þessu bíói sem er í gangi hérna. Þetta er bara gamanmynd," sagði Aron Einar léttur, en hvar mun hann sitja á leiknum á laugardaginn?
"Ég verð með fjölskyldunni. Það verður öðruvísi en að vera á vellinum og taka þátt í leiknum. Ég held ég verði meira stressaður upp í stúku en eitthvað annað. Ég reyni bara að njóta stemningarinnar í botn upp í stúku þar sem maður fær hana beint í smettið," sagði Aron Einar Gunnarsson.
