Lægri hagvöxtur í Kína gæti valdið annarri kreppu

Kínverjar munu kynna þrettándu fimm ára áætlun sína í næstu viku. Talið er að hún muni setja tóninn fyrir efnahagslífið um allan heim næstu ár.

Sérfræðingar óttast að nýja áætlunin lofi lægri hagvexti en áður, sökum hruns hlutabréfamarkaðar í sumar og rólegra efnahagslífs í Kína. Undanfarin ár hefur Kína lofað 7 prósenta hagvexti á hverju ári. Sérfræðingar hjá Credit Suisse telja að Kínverjar hafi mögulega ýkt hagvaxtartölur undanfarin misseri og því verði hagvaxtarspáin lægri. Þar sem hagvöxtur í Kína nemur 32 prósentum af öllum hagvexti heimsins, samkvæmt Credit Suisse, gæti þetta haft hrunáhrif á hlutabréfamarkaði heimsins og jafnvel komið af stað kreppu.