Slóvenar kalla herinn út

Slóvenski herinn hefur verið kallaður út til að taka á móti þeim þúsundum flóttamanna sem væntanlegir eru til landsins á næstu dögum. Leiðtogar landsins hafa gefið út að það muni aðeins þjóna sem tímabundið stopp en ekki endanlegur áfangastaður flóttafólksins. Þetta kemur fram á BBC.

Forsætisráðherrann Miro Cerar sagði á blaðamannafundi að hermennirnir kæmu til með að hjálpa til við flutning og tæknilega aðstoð flóttamannanna. Tæplega 3.000 flóttamenn komu til landsins í dag og hefur fimmtungur þeirra haldið för sinni áfram til Austurríkis.

„Við reynum að haga málum þannig að ástandið komi ekki niður á íbúum landsins. Landið verður að virka eðlilega,“ segir Cerar. Síðasta mánuðinn komu um 3.000 flóttamenn til landsins en sú tala tvöfaldaðist nánast í gær.

Gripið var til þessara aðgerða nú eftir að Ungverjar lokuðu landamærum sínum að Króatíu í gær til að stemma stigu við fjölda flóttafólks á leið í landið. Flestir flóttamannanna eru frá Sýrlandi og stefna vestur á bóginn til Austurríkis eða Þýskalands.