„Rannsóknar­nefndir verða stofnaðar“

Þingkosningar eru fram undan í Bandaríkjunum á þriðjudag og er staða Demókrata í könnunum góð.

Að sögn Friðjóns Friðjónssonar, borgarfulltrúa og sérfræðings í bandarískum stjórnmálum, eru yfirgnæfandi líkur á að Demókratar vinni sigur í fulltrúadeild og mjög góðar líkur sömuleiðis á að þeir nái meirihluta í öldungadeildinni.

„Menn eru að meta þetta svona á bilinu 65-75 prósent líkur en það er samt sem áður alltaf möguleiki á einhverju öðru. Þetta er ekki ein kosning, þetta eru margar kosningar þannig að þær þurfa allar að falla með demókrötum, allavega flestar til þess að þeir nái tökum á öldungadeildinni,“ sagði Friðjón í viðtali í hádegisfréttum Bylgjunnar.

Stjórnkerfið muni lenda í vandræðum

Kosningaþátttaka hafi verið góð og nú þegar séu um 40 milljón atkvæði komin í hús. Fari svo að demókratar nái meirihluta í báðum deildum muni Trump lenda í vandræðum.

„Rannsóknarnefndir verða stofnaðar og það verður farið í mál inni í deildunum til þess að kanna embættisaðgerðir Trump en ekki síður ráðherranna hans,“ segir Friðjón.

„Þeir munu lenda í svona embættismissismálum, impeachment eins og það heitir á ensku. Þannig að allt stjórnkerfið í kringum framkvæmdarvaldið og kringum Trump mun lenda í vandræðum með að vinna vinnuna sína.“

„Pólitískt séð betra fyrir demókrata að hafa Trump í embætti“

Hann segir forseta þó áður hafa lent í þessari stöðu. Trump muni hafa einhverja möguleika á að færa fjármagn á milli verkefna þó að fjárveitingavaldið færist til Demókrata nái þeir meirihluta. Trump geti þó stjórnað með tilskipunum.

Friðjón telur að demókratar muni beina spjótum sínum að embættismönnum eins og varnarmálaráðherranum Pete Hegseth, Pam Bondi fyrrum dómsmálaráðherra og Steve Witkoff sérstökum erindreka Bandaríkjastjórnar.

Þá verði heimavarnarmálin sömuleiðis skoðuð sérstaklega þar sem herlið innflytjendaeftirlitsins ICE sé undir.

„Mér finnst ólíklegt að þeir fari í mál til embættismissis á hendur Trump, vegna þess að pólitískt séð er betra fyrir demókrata að hafa Trump í embætti heldur en að hleypa JD Vance í embætti og vera sitjandi forseti í næstu kosningum þegar hann getur boðið sig fram.“

„Síðan eru alltaf einhverjir sem koma á óvart“

Tvö ár eru eftir af kjörtímabili Donalds Trump en forsetakosningar fara fram í nóvember 2028. Friðjón segir nú þegar nokkuð ljóst hverjir munu bítast um tilnefningar flokkanna tveggja.

„Það blasir við að Gavin Newson, ríkisstjóri Kaliforníu, gefi kost á sér. Það er mikið talað um Jon Ossoff, öldungadeildarþingmann Georgíu, og Pete Buttigieg, sem bauð sig fram fyrir fjórum árum. Svo eru auðvitað einhverjir á brúninni að tilkynna um framboð en það eru mjög margir farnir af stað að skoða málin og safna liði,“ segir Friðjón og bætir við að enginn hafi búist við því fyrirfram að Trump yrði forseti árið 2016.

„Repúblikanamegin munu JD Vance og Marco Rubio takast á og verða stærstu nöfnin þeim megin. Síðan eru alltaf einhverjir sem koma á óvart.“