Fiorentina tyllti sér á toppinn á ný með öruggum sigri

Fiorentina náði toppsætinu aftur í ítölsku deildinni með 2-0 sigri á Sampdoria á útivelli í kvöld en þetta var þriðji sigur Fiorentina í röð.

Eftir 1-0 sigur Inter á Torino í dag þurfti Fiorentina á sigri að halda til þess að halda toppsætinu og fengu lærisveinar Paulo Sousa sannkallaða drauambyrjun þegar Josip Ilicić kom þeim yfir á vítapunktinum á 10. mínútu leiksins.

Nikola Kalinić bætti við öðru marki Fiorentina og gerði út um leikinn á upphafsmínútum seinni hálfleiks en ekki er hægt að segja ananð en að sigurinn hafi verið verðskuldaður.

Þá vann Napoli 1-0 sigur á Udinese á heimavelli en Gonzalo Higuain skoraði eina mark leiksins fyrir Napoli í upphafi seinni hálfleiks.

Higuian hefur verið óstöðvandi undanfarnar vikur en hann hefur skorað sjö mörk í síðustu níu leikjum.