Samfélagsmiðillinn sem Facebook virðist óttast

Tiltölulega nýr samfélagsmiðill virðist hafa valdið ókyrrð í höfuðstöðvum tæknirisans Facebook. Á dögunum komu forsvarsmenn Facebook í veg fyrir að notendur Tsu gætu birt færslur á Facebook og jafnframt var öllum færslum og tenglum við Tsu eytt.

Það sem gerir hinn rúmlega ársgamla Tsu nokkuð einstakt er að notendum samfélagsmiðilsins fá greitt fyrir að vera þar. 90 prósent þeirra auglýsingatekna sem fyrirtækið aflað verður dreift á notendur. Á einu ári urðu notendur Tsu rúm milljón sem þykir mikill og hraður vöxtur fyrir nýjan samfélagsmiðil.

Stofnandi miðilsins, Sebastian Sobczak, hefur sagt opinberlega að notendur samfélagsmiðla eigi að fá greitt fyrir efni sitt þar sem samfélagsmiðlar reiða sig á efni þeirra.

Til þess að komast inn á Tsu þarf að setja inn notendanafn sem þegar er í notkun á samfélagsmiðlinum. Hins vegar skiptir það máli við tekjudreifingu Tsu hve stórt vinanet notenda er. Hve mikið hver notandi fær borgað byggir á fjölda vina og hve marga hver notandi hefur fengið til að skrá sig á Tsu og koll af kolli.

Þá skiptir einnig máli hve margar færslur hver notandi setur inn, sem þýðir aðeins eitt: Búið ykkur undir margar myndir af hvetjandi texta, líkamsræktarmyndum og upplýsingum um hvað köttur vinar þíns gerði í dag. Þar að auki er ekki útlit fyrir að gróði hvers og eins notenda sé mikill.

Þrátt fyrir að Tsu virðist hafa skotið forsvarsmönnum Facebook skelk í bringu, vakna spurningar um hvort að þessi smái samfélagsmiðill muni ekki þurfa að gefast upp á endanum. Enda hafa margir reynt að skáka Facebook og þar af tæknirisar á borð við Google. Hingað til hefur þó engum tekist að velta Facebook úr sessi.

Hér má sjá viðtal við Sobczak frá því í febrúar.