Bæjarar að bjóða 3,3 milljarða í árslaun

Þýska stórliðið Bayern München er tilbúið að ganga langt til þess að halda spænska þjálfaranum Pep Guardiola hjá félaginu ef marka má nýjust fréttir frá herbúðum þýsku meistaranna.

The Mirror slær því upp í morgun að Bæjarar séu tilbúnir að borga Pep Guardiola 17 milljónir punda í árslaun, um 3,3 milljarða íslenskra króna, svo að hann framlengi frekar við Bayern en að fara til liðs í ensku úrvalsdeildinni.

Roman Abramovich, eigandi Chelsea, er sagður vera einn af mörgum vel stæðum eigendum í ensku úrvalsdeildinni sem hefur mikinn áhuga á því að ráða Guardiola til starfa. Það einnig vitað að Pep er einnig inn á radarnum hjá Manchester City og Arsenal.

Núverandi samningur Guardiola og Bayern München rennur út í sumar og Bayern vill að hann framlengi um tvö ár eða til ársins 2018.

Bæjarar vilja ganga frá þessu sem fyrst og eru tilbúnir að bjóða Guardiola gull og græna skóga, bæði í formi laungreiðslna og ýmiskonar bónusa.

Pep Guardiola er launahæsti knattspyrnustjóri heimsins í dag með 14 milljónir punda í árslaun, um 2,8 milljónir punda, en Jose Mourinho, knattspyrnustjóri Chelsea, fær 12 milljónir í árslaun.

Karl-Heinz Rummenigge, stjórnarformaður Bayern München, hefur sett pressu á það að hefja viðræður þegar þýska deildin fer í vetrarfrí. Guardiola hefur ekki tekið illa í þær hugmyndir samkvæmt heimildum The Mirror.

Guardiola er aftur á móti áhugasamari um að framlengja bara um eitt ár frekar en tvö ár en það er eitthvað sem  Pep var þekktur fyrir að gera þegar hann var með Barcelona-liðið á sínum tíma.

Slíkur eins árs samningur myndi halda mörgu opnu fyrir Guardiola sumarið 2017 þegar mörg stór störf gætu verið í boði í ensku úrvalsdeildinni.