Ronda fær tækifæri til að hefna gegn Holm

Dana White, forseti UFC, hefur staðfest að Ronda Rousey muni fara aftur í búrið gegn Holly Holm.

Holm kom heiminum á óvart í Ástralíu á dögunum er hún rotaði Rousey í annarri lotu. Ein óvæntustu úrslit ársins í íþróttaheiminum öllum.

„Ef við látum þær ekki keppa aftur þá ættum við Lorenzo Fertitta [stjórnarformaður UFC] að missa vinnuna,“ sagði White.

„Það verður af þessum bardaga. Þetta er bardaginn sem heimurinn vill sjá.“

Ronda hafði ótrúlega yfirburði í íþróttinni þar til Holm rotaði hana. Hún hafði verið að vinna bardaga sína á aðeins 14 og 16 sekúndum.

„Hún á skilið að fá annan bardaga og Holly er sammála því.“

Það er óljóst hvenær af bardaganum verður enda er Ronda að einbeita sér að kvikmyndaferli sínum og öðru þessa dagana. Varla hefur heyrst frá henni síðan hún tapaði bardaganum.